Japan, 2 June : Hockey te, India kali Japan laga Kakamigahara te choli thaka Men’s Under-18 Asia Cup laga Pool A third match te Korea ke 4-1 te harai dise.
India captain Ketan Kushwaha bisi bhal performance dikhaise aru duita goal marise. Tai third minute aru 36th minute te goal korisey. Varinder Singh fifth minute te aru ekta goal marise, jiman Shahrukh Ali 54th minute te powerful strike mari India laga jit tu confirm kori dise. Korea laga ekmatro goal captain Yun Jaehyeok pora 21st minute te ahise.
India match tu bisi bhal dhang te shuru korisey, agey panch minute bhitor te dui-ta goal mari lead loi loise. Penalty corner pora rebound pai Kushwaha prothom goal marise, itu pichete Varinder advantage tu duguna kori dise.
Korea captain Jaehyeok penalty corner convert kori ekta goal ghurai anise, kintu India pura match bhitorot control rakhi thakise. Second half te India aro besi attacking khelise aru Kushwaha aru Shahrukh Ali laga goal pora lead barhai dise.
Itu jit pora India etiya Pool A te Korea aru Japan logot saman 6 points loi ase. Sob pool pora top dui team semi-final te qualify koribo. India etiya kali Chinese Taipei logot itu final pool match khelibo.
