Uttar Pradesh, 21 November : India laga debut campaign World Boxing Cup Finals 2025 te, Greater Noida, Uttar Pradesh te aji ekta dangor safalata loge finish kurise — India milikina total noita gold medal paise last din te.
Indian mahila boxers Jaismine Lamboria, Nikhat Zareen, Parveen Hooda, Arundhati Choudhary, Preeti Pawar, Minakshi Hooda aru Nupur Sheoran milaikina aji 7 gold medal loi India ke ekta historic achievement te loi jabole tulidise.
Jaismine Lamboria women 57 kg te GOLD medal jitishe, Taipei laga Wu Shih Yi ke 4-1 te harai dise. Nikhat Zareen 51 kg category te gold loi ase, Chinese Taipei laga Xuan Yi Guo ke 5-0 te harai kina. Parveen Hooda Japan laga Ayaka Taguchi te 3-2 te jitikina dangor fight dikhai dise aru 60 kg category te gold loi napai.
70 kg category te, Arundhati Choudhary Uzbekistan laga Aziza Zokirova ke 5-0 te clean verdict loge harai dise. Preeti Pawar bhi 54 kg te Italy laga Sirine Charaabi ke 5-0 clean sweep te harai gold loi dise. 48 kg division te Minakshi Hooda Uzbekistan laga Fozilova Farzona ke 5-0 te dominate kurikina gold jitishe. Nupur Sheoran bhi 80-plus kg category te Uzbekistan laga Oltinoy Sotimboeva ke harai kina gold loi dise.
Men’s section te, Sachin Siwach aru Hitesh Gulia bhi nijor category te gold medal loi dise. Sachin 60 kg final te Paris Olympics silver medallist Kyrgyzstan laga Munarbek Seitbek Uulu ke harai kina GOLD loi dise. Hitesh Kazakhstan laga Mursal Nurbek ke 70 kg final te harai kina gold loi dise.
Indian men boxers charita silver medal bhi loi ase. 80 kg final te Ankush Panghal England laga Oladimeji Shittu te haraise. 65 kg te Abhinash Jamwal Japan laga Shion Nishiyama logot dangor fight kuri pichete haraise. 55 kg category te Pawan Bartwal Uzbekistan laga Samandar Olimov logot strong challenge dikhai pichete haraise. 50 kg category te, tinita intense round pichete Jadumani Singh Uzbekistan laga Asilbek Jalilov te haraise.
Add Comment