Uttar Pradesh, 20 November : World Boxing Cup laga final te, India laga mahila boxer Arundhati Choudhary, Preeti Pawar, Minakshi Hooda aru Nupur Sheoran milikene Greater Noida, Uttar Pradesh te ekta “golden sweep” kori dikhai dise, aru itu desh laga ekta itihash te likhabo loga dangor achievement ase.
70-kilogram category te, Arundhati Choudhary Uzbekistan laga Aziza Zokirova ke 5-0 laga clean verdict te harai dise. Preeti Pawar bhi 54-kilogram event te ekdom clean sweep kori Italy laga Sirine Charaabi ke 5-0 te harai dise. India laga “gold rush” cholti thakise, jun 48-kilogram division te Minakshi Hooda Uzbekistan laga Fozilova Farzona ke ekdom commanding style te, abar 5-0 score te harai dise.
Nupur Sheoran bhi India te choutha gold ani dise, 80-plus-kilogram category te Uzbekistan laga Oltinoy Sotimboeva ke harai kene.
India laga men boxer khan chaar ta silver paise karon taikan laga final match khan te haraise.
• 80-kilogram final te, Ankush Panghal England laga Oladimeji Shittu logot harise.
• 65-kilogram division te, Abhinash Jamwal Japan laga Shion Nishiyama logot ekta bhal fight kori harise.
• 55-kilogram category te, Pawan Bartwal bhal challenge dibi parile bi Uzbekistan laga Samandar Olimov logot final te harise.
• 50-kilogram category te, tin ta intense round laga pisot, Jadumani Singh Uzbekistan laga Asilbek Jalilov logot harise.
Add Comment