Agencies, 24 November: India te government para komti hoilebe 43 mobile apps bondh korise. MangoTV, AliSuppliers Mobile App, Alibaba Workbench, WeTV – TV version, WeTV – Cdrama, Kdrama&More, WeTV Lite toh India te apps bondh howa khan majode ase. Bondh kora list te be dating apps ase aro etu toh We Date, Singol, TrulyChinese, TrulyAsian, ChinaLove, DateMyAge, AsianDate,FlirtWish, Guys Only Dating, Rela nesana khan ase. Tusara te short video sharing app Snack video, Business card reader app Cam Card, truck aro driver aggregator Lalamove ase.
Tuesday te Ministry of Electronics and Information Technology para statement te koise, “Information Technology Act laga section 69A pithor te etu bondh kora step toh loise. Kelay koile etu para India laga soverignty, integrity, defence, security aro public order te dekthari howa nemide”.
Ministry koise, India te etu apps toh users para kushibole nemide bondh koribole order deya toh Indian Cyber Crime Coordination Center, Ministry of Home Affairs para khobor powa bechide ase.
July 2020 te, government para be Line of Actual Control (LAC), eastern Ladakh te tensions thaka samai besi Chinese apps bondh kora thakise. Etu apps toh India laga sovereignty, integrity and defence te beya hobole engage thakise koise. Popular Chinese apps TikTok, Shareit, Helo, Shein, Likee, WeChat, UC Browser be bondh korise. June laga moina Ladakh Galwan Valley te Chinese sepai logode gondogol para komti hoilebe 20 Indian sepai mora thakise.
Add Comment