Indian 2 laga OTT release date announce hoisey

New Delhi, August 02: Shankar laga 1996 hit film Indian laga second part Indian 2  tu theatre te juwa moina  release hoisiley. Hoilebi eman bhal response pa nai. Etya etu film laga Netflix te release hobole thaka date announce hoisey. Etu film tu August 9 para Netflix te bisi bhasa te release hobole asey. Aro etu bhasa khan tu Tamil, Telugu, Kannada aro Malayalam asey.  Etu film tu theatre te July 12 te release hoisiley. Aro release hoikina ek moina bi nuhuwa ageyte Netflix te bi release hobole asey. Hit film, Indian laga second part Indian 2 tu release huwa homoitey audience(film sa manu) aro critics(film ke saikina opinion diya laga kaam kora manu) khan para eman bhal response diya nai. Aro etu nimitey film bana manu khan para  etu film ke 20 minutes para katidisey. 20 minutes kata pichyete etu film tu etya 2 ghonta 40 minutes laga hoisey. India 2 te Senapathy laga kahani continue korey. Aro Kamal Hasan para tailaga kirdar wapas nibhaisey. Kamal Hassan laga alava Indian 2 te Siddharth, Rakul Preet Singh, Priya Bhavani Shankar, Bobby Simha, SJ Suryah aro Vivek thakisey. Kajal Aggarwal para bi etu film te ekta role nimitey shoot kurisiley hoilebi Shankar para announce kurisey ki tailaga character tu Indian 3 te ahibo. Kamal ke recently Nag Ashwin laga Telugu film Kalki 2898 AD te dikhisiley. Tai tu Indian 3 te bi thakibole asey. Kamal Hassan tu etya Mani Ratnam laga Thug Life nimitey bi shooting kuri asey.