Oslo, 3 June : India laga chess star Praggnanandhaa Rameshbabu para Norway Chess tournament laga round seven te Alireza Firouzja ke classical game te harai dise. Itu logote, World Champion D Gukesh para Wesley So ke Armageddon game te harai kina additional points hasil kurise.
Praggnanandhaa para lamba aru tough match te Firouzja ke outplay kurise aru nijor advantage ke bhal karone use kurikina important victory hasil kurise. Itu result karone points table laga top position race aro interesting hoi jaise. Firouzja karone etu tournament te second classical defeat hoise.
World Champion Gukesh aru Wesley So laga classical game draw te sesh hoise. Kintu Armageddon game te Gukesh jiti kina extra points pai loise.
World No. 1 Magnus Carlsen aru Vincent Keymer bhi lamba aru competitive classical game khelikina draw kurise. Kunubai breakthrough koribo paranai. Itu pichete Armageddon game te Carlsen jitise aru extra points hasil kurikina leaders laga usorte thaki ase.
Round seven sesh hua pichete Wesley So 12.5 points logot etiya tournament leader ase. Alireza Firouzja 10 points logot second position te ase. Magnus Carlsen, Vincent Keymer aru Praggnanandhaa Rameshbabu tinijon 9 points logot itu pichete ase.
Women’s section te India laga Humpy Koneru aru Divya Deshmukh laga classical game tense battle pora draw te sesh hoise. Kintu Armageddon game te Divya para black pieces logot jitise aru extra points pai kina Assaubayeva laga sabse najik challenger hisab te nijor position aro majboot kurise.
