Netherlands, 18 June : Indian junior women’s hockey team Europe Tour khotom korise ekta tight match logot, juntu te Netherlands host team logot goalless draw hobar pichhe shootout te 2-3 pora haar paise.
India laga team etu match te pua age already charita match jitise — tinita Belgium logot aru ekta Australia logot. Tai sobho confidence te Dutch team logot khelise, jun ekta technically strong team ase. Match dangor competitive thakise, aru India laga junior side grit aru composure dekhaise.
Char quarter te dui team milke bishi scoring chance banai thakile bhi, disciplined defending aru goalkeeper laga bhal performance karone kunu team goal maribo naparile.
Match shootout te jabo pora, India laga taraf pora Lalrinpuii aru Priyanka Yadav nijor chance convert korise. Kintu Netherlands laga Imme de Leeuw, Roos Alkemade aru Lotte Rust successful strike dise, aru match 3-2 te Netherlands jitilaye.
Tour bhal performance logot khotom hoise — India laga junior women’s team paanch match pora charita jitise, aru valuable international experience bhi paise. Itu exposure dangor kaam ahibo future competition karone, specially FIH Hockey Women’s Junior World Cup 2025 karone, jun December 1 pora 13 tak hobo Santiago, Chile te.
Add Comment