PALU, SEPTEMBER 30 : Indonesia desh te mati hela aro Tsunami (pani ajanak te bhorta pora uthe aha) huikena thakise. Etu pora tai kan desh te besi dangor chamala kuridese. Etu pora ahkete 48 jun manu mura khoborte hunese. Etu bejete 400 jun pora besi murise koi kena hunese. Huilebi Sunday din te toh nai-nai koilebi 800 jun pora besi jun manu mura huijaise koise.
National Disaster Agency nemite kotha kura manu Sutopo Purwo Nugroho pora koa hisabte nai-nai koilebi 832 jun manu kan etu nahua chamala pora muraide kena ase koi kena khobor te janaise. Huilebi chuti etu mati hela aro tsunami hua pora dangor kuride kena thaka pora manu kan ke phasaide kena thaka logot arobi bhal te ki-ki besara-besari kurikena saise koile etu 832 porabi besi hobo nesena ase koi kena, Indonesian Vice President Jusuf Kalla aro tusera Authorities kan pora janaise.
Indonesian Authorities kan bi etu besi jun murikena thaka kan nemite mati bitorte chulti pora ekbar tehi thalidebole (mass burial) lagi koi kena janaise. Kele etu nahuile tai kan desh laga manu kan zinda te thaka kan logot nahua bemar (spread disease) kuridele nahobo koi kena.
Etu chamala asulte mati hela ahkete huise. Etubi 7.5 magnitude kathara pora. Etu bejete hi tsunami huise. Etu hisabte mati besi kathara pora hela karnehi etu tsunami hua laga ase koi kena, khobor hisabte janaise. Aro etu porahi khor kan bhangaide kena aro ki-ki besi ulta-bolta kuride kena thakise koise.
Add Comment