Iran president pora Parliament logode 4 notun ministers manibole janaise

Agencies, 28 October: Iranian President Hassan Rouhani pora Parliament logode jarta notun ministers manibole aro tai laga government logode motob koribo karni janaise. Kelay koile US khan Islamic Republic logode kelaaf kori kena aro-sanctions koribo kowah karni. May moina 2015 nuclear accord pora President Donald Trump’s olaija bechide US khan asti pora Iran logode sanctions kora thakise. Ahha moina US pora Iran laga tail aro gas industry deh sanction koribole plan kori ase. Iran khan toh economy chamala de dukh powah be pai kena ase aro jaijaa agae moina time deh sanction namaidebo karni Iranian officials khan kosish kora thakise. Rouhani pora lawmakers khan logode kowah toh, ami khan dekthari pai thaga toh eki logode motob kori kena joldi thek koribo lagibo. Rouhani pora US toh Iran’s laga sobse dangor dushman ase koise. Tai khan dushman nahoise koile medicine aro bhaat deh sanction nakoribo thaga ase koise. Rouhani pora Iran aro US toh economic war deh ase koise. Tai khan US logode theng laga nejide annibo lagi koise. Ausust moina Khamenei pora US khan logode kotha korise koile nejor he jokhom khabo kowah thakise. Etu pora tai khan kotha nakoribo kowah thakise. Etu moina agae hapta phalli highest court pora US logode order kora toh, Iran logode sanction othaidebe kowah thakise.