Iraq, March 15: Iraq laga Prime Minister para koisey ki Iraq laga national intelligence service te kaam kora manu khan, kun United States para command kora coalition forces logotey kaam korey, taikhan para Iraq aro Syria laga head of Islamic State ke moraidisey.
Prime Minister Mohammed Shia-al-Sudani para X te post kora ekta statement te enaka koisey, “Iraq laga manu khan tu andhera aro atangwad laga takat opor te aro ekbar dangor jeet hasil kurisey.” Tai para enaka bi koisey, “Abdallah Maki Mosleh al-Rifai nohoilebi “Abu Khadija” tu etu atangwadi group ISIS laga “deputy caliph’ aro “Irag aro duniya laga sobsey khatarnak terrorist majotey ekta” asey.”
US President Donald Trumph para tailaga Truth Social platform te Friday rati te enaka koisey, “Aji Iraq te ISIS laga ekjun polaithaka leader ke moraidisey. Taikey amikhan laga bahadur warfighters khan para Iraqi government aro Kurdish regional government logotey milikina moraidisey.”
CNN laga report hisap te ekjun security official para koisey ki etu operation tu Iraq laga western province Anbar te airstrike(akash para hamla kora) kurikina execute kurisey. Aro dusra official para kuwa hisap te, al-Rifai murisey koikina Friday din te verify hoisey hoilebi taikey mora laga operation tu Thursday arti te hoisey. Taikhan ke public comments dibole laga permission thakanai, etunimitey taikhan para nijor laga pehchan lukaikina kotha kurisey.
Etu ISIS chief ke moraidiya laga announcement tu Syria laga top government under te kaam kora manu para Iraq te first visit kora laga ekey din te ahisey. Etu homoitey, etu duita desh para IS laga khilaf te larayi kuribole eksath milikina kaam kuribole laga kososm khaisey.
Add Comment