Nagaland

IRCSN, Dimapur, Wokha te World Red Cross Day Manaishe

May 9, 2019
45 Views

Agencies:

Indian Red Cross Society, Nagaland (IRCSN) State Branch, Dimapur, Wokha te 8th May 2019 te World Red Cross Day manaishe.

Indian Red Cross Society, Nagaland (IRCSN) toh Kohima laga Red Cross Complex laga Conference Hall te maishe. World Red Cross Day 2019 laga theme toh “what you love about Red Cross” dishe.

General Secretary, IRCSN, Kepelhusie Terhüja tai laga welcome kotha te duniya laga 97 million Red Cross staff aro India te Red Cross laga 700 branches khan opor te kotha kurishe. General Secretary koishe IRCSN toh 33 years purana hoishe aro Red Cross toh ghatna khan samay te manu khan ke modot dibole active part loi. General Secretary koishe state te hinsa aro ah-hinsa (non violence) te bodoli hubole lage koishe. Tai para aro koishe ke India toh Red Cross (RC) laga hissa huwa 100 years manabole ase. Etu nimite tai para koishe ke Indian Red Cross toh duita Geneva Protocols toh sign kuribole lage. Duita Geneva Protocols toh India te RC service toh 100 years huwa pichete bhi sign nakuri kena ase. Tai para aro koishe ke Governor laga leadership te duita “birds heaven” device kuribole ase. Tai khan etu jaga te chiriya (birds) khan toh surakshit thakibo. Aro etu toh sob district te introduce kuribole ase. Governor toh IRCSN laga president ase. Tai para aro koishe ke judi Nagaland laga sob jaat (tribes), factions, aro churches respond kuri kena Genva Code sign kurile. State te hinsa toh komti kuribo koishe.

Advisor, Rural Development, Dr. Neikeisalie Nicky Kire bhi IRCSN, World Red Cross Day te kotha kurishe.

Programme toh Abeni TCK para chair kurishe. Abeni toh IRCSN Chairperson ase aro vote of thanks toh Helena Yepthomi para dishe . Helena Yepthomi toh IRCSN laga Managing Committee member ase.

Dimapur district Red Cross Society bhi World Red Cross Day manishe. Etu programme te DC Dimapur, Kevekha Kevin Zehol ke special guest hesab te matishe. DC Dimapur Kevekha Kevin Zehol toh Dimapur IRCS laga president bhi ase. Aro Swami Chinmaynanda Ji Maharaj ke programme te guest of honour hesab te matishe. Programme toh Pranabananda Women’s College, Dimapur te 8th May 2019 te thakishe.

Deputy Commissioner para Red Cross Society logote state aro national level te bishi saal melia laga kotha koishe. Tai para koishe ke duniya te sob para dangor khushi toh dusra manu khan ke modot kura ase.

Deputy Commissioner para district te Red Cross Society pura khotom nohoi kena thaka opor te concern thaka koishe. Red Cross building toh olop moina para building toh nabanai kena thaka toh mon chinta hoishe.

Guest of honour aro aro President District Citizen Forum, Joseph Lemtur para speeches dishe. Programme toh Managing Committee member Kuldeep Jain para chair kurishe. Aro welcome address aro vote of thanks toh Chairman, IRCS Dimapur District Branch, Chandu Agarwal aro Honorary Secretary, IRCS, Dimapur District Branch, K.K. Paul para dishe.

Wokha DBHSS Youth Centre te World Red Cross Day manishe. Chairman, IRCS Wokha Branch & Deputy Commissioner, Dr.Manazir Jeelani Samoon, IAS koishe International Red Cross movement toh International humanitarian movement ase aro etu te dduniya pura para 17 million nisina volunteers, members aro staff worldwide ase. Red Cross toh manu khan laga jeevan aro health bachabole nimite banaishe. Red Cross toh 1863 saal te Geneva, Switzerland te suru kurishe.

Manazir koishe Red Cross toh duniya laga sob para dangor humanitarian organization ase. Tai para koishe ke Red Cross Society laag main function toh sipai khan ke modot dibole aro larai te jokom huwa khan ke sabole nimite, disaster relief, blood collection aro community khan ke education dibole aro outreach kuribole nimite ase.

Honorary Secretary, IRCS Wokha, Dr.K.Z.Ovung para IRCS Wokha Branch para jua panch saal te ke kaam kurishe etu opor te olop kotha kurishe.

Rev.Dr. Tsanso para theme opor te prathana kura samay te humanitarian Society laga founders ke samaan dibole koishe. Tai koishe hodai saal Red Cross volunteers para 300 million manu khan laga jevaan bachai thake. Tai para Red Cross Society laga saatha fundamental principles opor te bhi kotha koishe.