November 22, 2023: Israel-Hamas laka war kuto choi hapta karne jai taki shae, Wednesday din deh etu war laka first deal ekta ahi shae. Israeli government para char din karne ceasefire dibo kui shae Hamas kan keh aro etu laka putli Hamas kan para 50 maike aro bacha kan keh release kui bo.
“Etu kuri leh b, war tho kotom hua nai,” Prime Minister Benjamin Netanyahu para kui shae. Taila war cabinet para deal deh acha nakwa time deh tai para etu kui shae. Hamas kan keh pura kotom nakura ta karo hostages kan sob release nakura tak war tho jai taki bo. Mukan war deh ase aro mukan lalka goals kan napa tak war tho kuri taki bo. Hamas keh bangai di bo, hostages kan pura wapas ani bo,” Netanyahu para meeting laka agae deh kui shae,
Qatar laka officials kan para Hamas aro Israel majo lak deal tho mediate kuri shae. Etu deal deh acha kubo leh Netanyahu para US President Joe Biden taike motot kuri shae kui shae.
Mukan deal laka ki jane itia
- Char din laka ceasefire deh, 50 maike aro bacha kan Hamas para release kuri bo
- Deal tho kitia para shuru kuri bo etu tho clear para kwa nai hoile b hostages kan Thursday din para tho release kuri bo pareh.
- Israeli government para Hamas kan aro tostah hostages release kuri taki leh, taikan b ek din extra di taki bo kui shae ceasefire deh.
- Hamas laka statement isap deh, taikan para 150 Palestinians kan keh release kuri bole ase Israeli jails kan para.
Pura rati meeting lua piche deh tuita side b deal deh acha kui di shae. Netanyahu para decision tho lubo leh dictar taki shae kui shae hoile b etu tho thik taki shae kui shae.
Add Comment