Jammu & Kashmir te Jaish terrorists tin(3) jun morishe

Srinagar: Jammu & Kashmir laga Tral jaga te security forces aro Jaish-e-Mohammed terrorists majot te besi thiri mara-mari korikena tinta(3) Jaish-e-Mohammed terrorists morishe, koikena Saturday pujur Police para khobor toh janaishe. Police para koishe ke, terrorists khan ke jeniboli parai nai aro etu jaga te search operation soruh hoikena jai thakishe. Terrorists khan laga hath para tinta(3) rifles paishe. Tral te larai kora te tin(3) jun najanai terrorist, JeM logot samil thaka khan ke mari thishe aro search operation jai thakishe,” koikena Jammu & Kashmir Police para koishe. Army aro police melikena operation kora samai thakishe aro etu hatsa toh Tral te 24 gonda major te tui(2) paar wala mara-mari kora thakishe. Friday din te be Srinagar osor Khrew jaga te tuita(2) terrorists ke moraishe. Police para koishe, etu terrorists khan toh south Kashmir te civilians ke mora deya manuh ase. Ek din akhe Rajouri district te bantok larai te junior Army officer ek jun morishe aro etu hatsa te terrorist ek jun ke be morai thishe koishe.  Officials para koishe ke, Jammu & Kashmir te terrorist khan para olop moina akhe para kam besi kori ase, etu oper te tai khan para political leaders aro party workers khan ke target kori ase. Thursday din te be terrorist khan Ghulam Hassan Lone laga ghor te jaikena  J&K Apni party laga political workers ek jun je goole para mari thishe koishe. Wednesday din party’s J&K spokesperson, Altaf Thakur para koishe ke, itya dak te 23 party members khan ke hamla aro morikena ase. Etu toh Kulgam district te party’s in-charge, Javid Dar ke morai deya beche ase.