New Delhi, March 03 : Manisha Rani para ‘Jhalak Dikhhla Jaa’ season 11 laga trophy uthaisey. Etu show tem on jitaidiya laga performance dikina, Rani tu akhir kar winner hoisey. Etu trophy logotey, Manisha Rani para Rs 30 lakh laga cash prize bi paisey. Tailaga choreographer, Ashutosh Pawar, tu Rs 10 lakh laga cash prize paisey. Etu opor te, taikhan duijun para Yas Island, Abu Dhabi te ekta dammi trip bi paisey. Jhalak Dikhhla Jaa laga finale episode tu Saturday, March 2nd te Sony Television te dikhaisiley.
Najanikina thaka manu khan nimitey, Jhalak Dikhhla Jaa season 11 laga top 5 finalist tu Manisha Rani, popular TV actor Shoaib Ibrahim, actor Adrija Sinha, social media influencer aro cricketer Yuzvendra Chahal laga maiki Dhanashree Verma aro ‘Indian Idol 5’ laga winner Sreerama Chandra thakisey. Manisha para tailaga ‘Jhalak’ journey ke reflect kurikina koisey, “Etu journey tu sapna hosa hoija para komti nohoi. Aro ami para etu sob tu judge aro audience laga morom, support aro encouragement nimitey kuribole parisey.”
Manisha para koisey, “Ami janey, etu experience para ami laga zindigi bodli kuridiboa aro etu para hosa bi enaka kuridisey. Ekta wildcard entry hoikina, ami para nijor ke prove kuribole nimitey duiguna bisi mehnat kuribole lagisey. Aro ekta dancer hoikina ekta ekta moment tu masti aro growth para bhorta hoisey.”
Tai para tailaga choreographer ke dhanyabad dikina koisey, “Ami tu Ashutosh ke bisi dhanyabad di asey, tai tu bisi bujidiya manu asey aro hodai hapta, tai para amikey amilaga limit ke barabole push kurisey aro ami laga dancing ability laga nutun pehloo discover kurisey. Etu jeet tu khali ami ekla laga hey nohoi; etu jeet tu utu sob manu laga asey kun para ami opor te bharosa kurisey aro etu pura journey te amikey support kurisey.
‘Jhalak Dikhhla Jaa’ laga final episode te ‘Murder Mubarak’ laga cast jaiseki Sara Ali Khan, Vijay Verma aro Sanjay Kapoor khan mojud thakisey. Taikhan para khali etu finale ke attend kora hey nohoikina stage te perform kuribole nimitey contestant khan ke join kurisey. Manisha aro Dhanashree tu wild-card contestant thakisey.
Add Comment