New Delhi, August 07 : John Abraham aro Sharvari laga film Vedaa tu August 15 te release hobole asey. Olop hapta ageyte, etu film laga makers khan para ekta official statement release kurikina koisey ki etu film tu Censor Board of Film Certification (CBFC) laga taraf para ekta clearance pabole baki asey. Etu picheyte enaka reports chuli thakisey kuntu te koisey ki etu film ke CBFC para eku part nakatikina clear ghosit kurisey. Etya, ekta nutun report te koisey ki CBFC LAGA Revising Committee (RC) para etu film te olop bodli anibole instruction disey.
Etu report te enaka koisey, “Etu film te ekta 1-minute 16 second lamba modified disclaimer(matlab jaiseki tobacco kha laga khilaf te warning diya nisna) aro voiceover dhalibole koisey. Maiki khan aro social identity ke refer kurikina naam botnam kora laga ekta dialogue ke modify kuribole koisey. Etu picheyte ekta 2 minute 16 second lamba hang kora laga scene ke delete kuridisey. Film te Jodhpur High Court ke refer kua homoitey chola ‘Jodhpur’ word tu mute kuridisey. Aro film te court bhitor te mara mari kora laga scene ke 30% para komaidibole koisey. Enaka kurikina, etu film laga makers khan ke etu film laga time ke para 6 minutes 15 second para komaidibole lagisey.”
Etu khan laga alava aro dusra changes khan bi anisey.
Add Comment