Agencies, 6 September: Official pora janaideya hesab de, Wednesday din Afghan laga capital jaga de wrestling match jai thakise, etu time de suicide bomb blast howah thakise koise. Etu pora blast howah jaga de emergency medical workers aro journalists khan joldi jaa time de second blast hoise koise. Etu blast pora nai-nai koilebe 20-jun moraidese koise. Afghan news organizations pora kowah hesab de, blast pora tuitaa journalist moraidese aro tusara jar jun ke jokhom howah thakise koise. Desh laga famous news channel ToloNews pora mora toh staff member ase koi-kena jani-paise. Ketya second blast hoise, etu time de correspondent aro cameraman toh national television de live report kori thakise koise. Afghan Interior Ministry laga spokesman Nasrat Rahimi pora janaideya hesab de, tuita bombing pora 70-jun ke jokhom hoise koise. Rahimi pora kowah hesab de, second blast toh gari de bomb thaki-kena putha laga ase koise. Amaq news agency laga hesab de, Wednesday din blast howah toh Islamic State pora kora laga ase koise. Etu area de, etu group khan pora schools, mosques aro training centers de hamla kori kena ase. Last time university preparatory course loi-thaga time de suicide bomb blast pora 48 jun moraideya thakise. Wednesday din blast howah jaga de witness Amir Yagana pora janaideya hesab de, blast howah bechide young athletes khan wrestling kapura change na-kori kena, jokhom pai kena thaga tai khan laga sati logode gym pora ola thakise koise. Etu bechide tai khan gari pesara thakise koise. Etu area laga manu Mohammed Dawood Azimi pora janaideya hesab de, first blast putha time de, tai roof de jai kena ke hoise shaa thakise koise. Tai toh arobe second blast hobo pari koi-kena phoi khai thakise koise. Etu pora tai hatsa howah jaga de jaa nai koise. Hoilebe tai roof de thaga time de manu khan kandi thaga honise koise. Etu bechide tai second blast howah toh honise (hear) koise. Etu desh de hamla hoi thaga toh Taliban khan karni ase. Tai khan Afghan districts de kabja kori kena Afghan forces logode besi phak cities de hamla kora thakise. Jowah moina be, south Kabul pora 100 mile dur Ghazni laga city de hamla kora thakise.
Add Comment