Kabul para 200 Indian nationals loikena IGI Airport ahishe

New Delhi: Tinta(3) flights- Air India, Vistara aro IndiGo para Indian nationals khan ke Kabul para loikena Sunday pujur  Indira Gandhi International (IGI) Airport, Delhi pongchise koishe. Etu samai 200 Indian manuh khan ghor pongchise koishe. Sukhwinder Singh toh Kabul te US embassy te kam kori ase, tai para koishe ke, Kabul laga streets te halat besi beya hoikena Afghanistan te manuh khan jarikena jaboli kori thakishe. Tai koishe ke, August 14 darik te halat besi beya howa nemite, Indian Embassy official laga motob para tai ke loikena jaishe. Etu beche tai Doha te bohi thakishe. “manuh besi fasikena thaka khan ke othaishe,” tai koishe. Tai aro koishe ke, tai nejor helicopter te thakishe aro etu samai manuh khan kushi para ghor jai thaka thikishe. Sukhwinder Singh para koishe, Taliban para Kabul te power toh kapzaa hoishe, Afghanistan para besi kalti kam korishe. “besi samai ami toh ghor wabas jaboli naparibo bapana thakishe, keli koile opai eku thaka nai”. Tai ke sawal kora te aro Kabul te jaikena kam koriboli hota te, tai para etu toh Afghanistan aro Indian government laga ristha oper te ase. Praveen Singh toh Kabul te UAE embassy te kam kori thaka ase aro tai para koishe, tai toh aro ketai be eman dukh jaga te jaikena kam nakoribo koishe. Kamal Chakravarti toh Kabul te private company ekta te kam kori thaka ghor wabas ahishe. Sunday din tai koishe ke, “ami ghor te wabas aha toh besi kushi ase, hoilebi ketai etu hatsa bapana koribo ami besi phui ase.” Tai koishe ke, Kabul te Afghan manuh khan Indians logot besi motob kori. Etu paar Indian government para ekta kam toh tai khan nemite koriboli lage.