Kabul: Rocket hamla te 1 jun morishe, 2 jun jokom

Kabul: December 12, 2020. Saturday din, Kabul te rocket para hamla kora te 1 jun manuh morishe aro tui(2) manuh jokom paishe, koikena officials para junai thishe. Eke moina pithor te Afghan Capital te etu hamla toh tui(2) paar wala hamla kora ase. Akhe moina te be, Afghanistan pura te larai kora khobor besi paikena ase. Taliban aro government pithor te September 12 darik para Qatar te peace talks kora samai howa ase koishe. “aji pujur, 10 rockets toh Kabul laga Labe Jar osor jaga para marishe koikena, interior ministry spokesman Tariq Arian para reporters khan logot koishe. Tai para kowa te, tinta(3) rockets toh Kabul airport osor te kerishe aro 7 toh manuh thaka ghor te marishe, etu samai civilians 1 jun morishe aro tui(2) manuh jokom paishe. Etai dak te hamla kora te kaun group para nam lowa nai aro Taliban khan para be eku samil nai koishe. Kabul te ek moina pithor te Saturday din laga hamla toh tui(2) paar wala ase koishe. November 21 darik te 8 jun manuh morishe aro 31 manuh jokom paishe, etu samai capital te 23 rockets mara te Islamic State group khan para nam loishe. ISIS khan para aro capital jaga laga educational centres te hamla korikena students mora toh nam loishe. Etu samai aro Kabul University classrooms te gooli para ek jun ke morai thishe. Afghan Vice President Amrullah Saleh para Saturday din Facebook page te koishe,  tai ke ISIS khan para dumki thishe aro Kabul toh “botli” korikena Shiites laga mora jaga kori thibo koishe. ISIS khan para Afghanistan te hotai minority Shiite Hazara community logot hamla kora khobor ase. Saturday din alag statement te, interior ministry para koishe, etu hamla toh “soft targets” ase koishe. “Afghanistan manuh laga dusman khan para larai toh tangor kori ase,” tai para aro koishe. November moina te, Pentagon para koishe, Afghanistan te 2,000 sepai thaka toh othaboli koishe. February moina te Washington aro Taliban para agreement te May 2021 dak te toh sepia pura hatabole koikena ase. Etu fesla kora te Taliban para desh te hamla nakoribo koishe, hoilebi Afghan authorities para hamla kora toh botnam thishe.