December 20, 2024, 04:18 PM: Itu Phevima Kacharigaon Village Council, Youth Organization aru itu Students’ Union para ekdam khushi napai kena, itu 17th December, 2024 tey teenta Naga youth khan ke assault kuria aru torture kuria ke condemn kurishey, tai khan majetey dui jon toh hoiley bona-fide citizen khan asey, tai khan laga village laga aru tai khan laga bhai khan asey, koi kena. Tai khan para koishey, itu khobor jana pichetey tai khan toh bishi asurit, disturbed thakishey aru bishi gusa uthishey, kiley eku galti nathaki kena, tai khan laga member khan ke matha tey bonduk rakhi kena uthai kena loi jaishey, tai khan kaga jail tey dhali dishey aru kiley janwar nishina torture kurishey, koishey?
Ki laga crime kurishey tai khan para, itu NSCN Akato group laga against tey, ki, tai khan ke eneka dushman nishina nahoiley bhi criminal nishi treat kurishey?
Tai khan para koishey, ki, tai khan kanishey ki, utu teen jon ke Michael Yepthomi laga ghor tey loi jaishey, kun toh hoiley Ato Kilonser asey NSCN Akato laga, Thahekhu Vilalge tey, kotey itu teen jon ke morom nathaki kena bishi biya para marishey aru tai khan ke AK 47 aru Pistol laga pichey para bhi mari di kena asey!
Village Council para itu letter para hudi asey ki, kiley Ato Kilonser, NSCN Akat otoh hoiley ekta Iron Cage banai kena asey tai khan ghor tey aru kiley galti nathaka manu ke, matha tey bonduk rakhi ken aitu cage bhitor tey para torture kurishey? Hudi asey, ki, “itu alag bonduk nabukha Naga citizen khan toh apni agetey criminal asey naki?”,”Ki apni khan laga haath tey bonduk thaka toh nijey laga blood brother khan ke abuse kuriboley karney asey naki?” Itu toh hoiley pura anti-Naga asey aru Naga manu khan agey ahiboley lagey, itu nishina seitan laga kaam kuria laga against tey fight kuriboley karney. Council para tai khan laga letter tey mention kurishey.
Add Comment