Kangana Ranaut laga ‘Emergency’ film tu September te release hobole asey

New Delhi, June 25 : Actor aro Member of Parliament(MP) Kangana Ranaut laga film ‘Emergency’ laga makers khan para Tuesday din te announce kurisey ki etu film tu September 6 te theatre te release hobole asey. Etu announcement tu Kangana Ranaut para 18^th Lok Sabha laga first session laga first din te Himachal Pradesh laga Mandi jaga laga BJP MP hoikina oath (safath) luwa laga ekdin picheyte ahisey. Etu political film laga relase date tu bisi baar delay kurisey. Ageyte etu film tu November 24, 2023 te release hobole asey koikina announce kurisiley. Etu film laga lead actor, writer, director aro producer Kangana Ranaut para koisey ki tai para etu film banabole nimitey William Shakespeare laga ‘The Tragedie of Macbeth’ play para inspiration loisey. Kangana Ranaut para ekta statement te koisey,”Ami William Shakespeare laga Macbeth para bisi inspire hoisey.” Aro koisey ki tai tu 6^th September 2024 te etu film release hobole thaka nimitey bisi josh para rukhi asey. X(Twitter) te dhala ekta post te Kangana Ranaut para koisiley ki tai para tailaga film release hobole thaka laga announcement tu azad hoikina thaka India laga 50^th year laga  sobsey bhayanak chapter laga suruwat ke mark kuribole nimitey kurisey. Etu film te Anupam Kher, Mahima Chaudhary, Milind Soman, Shreyas Talpade, Vishak Nair aro late Satish Kaushik bi main role te asey. Etu film ke Zee Studios aro Kangaana Ranaut laga Manikarnika Films para produce kurisey.