New Delhi, August 19 : Actress Kangana Ranaut, kun tailaga bahadur aro jhagra olaidiya laga bayan nimitey jana jai, tai recently koisey ki tai para Shah Rukh Khan, Ranbir Kapoor aro Akshay Kumar nisna star khan logotey kaam kuribole mana kurisey. Tai para etu bi koisey ki tai Bollywood party khan bi attend nokorey.
Tai para enaka koisey, “Ami Bollywood kisim laga manu nohoi, ami hosa te bi Bollywood laga manu khan logotey sathi hobole naparey. Bollywood laga manu khan tu nijor laga bari te bhabi thakey. Taikhan okra asey, taikhan budhu, protein shake asey…Taikhan tu grasshopper khan nisna asey, pura puri blank. Enaka manu logotey apni kinaka sathi hobo paribo? Taikhan tu kotey ki chuli asey etu najaney. Taikhan logotey kotha kuribole eku nathakey.”
Tai para enaka bi koisey, “Ami para ‘Khan’(Shah Rukh Khan, Salman Khan, Aamir Khan) laga film khan ke bi mana kuridisey. Sob ‘Khan’ tu amilogotey eman bhal para beybohar korey taikhan ami logotey kitya bi biya bebohar nokorey. Hoi, yatey enaka manu asey kun para amilogotey biya beybohar kurisey hoilebi ‘Khan’ khan tu etu khan majotey nohoi. Hoilebi ami para taikhan laga film kuribole mana kuridisey. Kilemaney taikhan laga film tu ekta sample nohoilebi example asey kotey heroine laga duita scene aro ekta gana thakey. Etu nimitey ami para koisey ami etu kuribole mon nai. Ami tu enaka maiki laga example hobole mon asey kun ekta A-list te thaka, sobsey top actor asey kun Khans(Shah Rukh Khan, Salman Khan, Aamir Khan) logotey kaam koranai.”
Add Comment