Mumbai, 7 March : Singer Karan Aujla etiya tai laga P-Pop Culture India Tour loi busy ase. Delhi te ekdam electrifying show pora tour start korise, kintu Mumbai concert tou loina tai aru tai laga team ke beshi criticism bhi paise. Backlash pora, Karan Mumbai te aru ekta show koribo kuina promise dishe. Etya singer nijae notun date announce korise aru agey te ticket kinise manuh khan karone ekta surprise bhi dishe.
Friday din, Karan Aujla Instagram te ekta video share kori Mumbai 2.0 concert April 12 te hobo ki announce korise. Singer koi dise ki March 3 show te kun kun manuh ticket kinina attend korise, taikhan karone Mumbai 2.0 concert ticket free hobo. Tai aru kun manuh agey laga Mumbai concert attend koribo parianai, taikhan bhi invite korise.
Karan March 3 te Mumbai te perform korise. Kintu Mumbai Holi concert tou loi fans khan complain korise ki management bhal nohoi, beshi gorom karone kunba manuh behosh hoise aru pani bhi thik thak nai. Kunba fans to VIP ticket kini thaka pora bhi Karan ke thik moto sabo napai kuina complain kori, etu ke “worst concert ever” kuina koi dise. Singer etu criticism notice kori, Pune concert itu pichete janai dise ki Mumbai te aru ekta show organise koribo.
Tour tou February 28 te Delhi te start hoise, kitia singer Boyfriend, Tauba Tauba, Admiring You, Softly, 52 Bars aru alag hit gaana perform korise. Kunba fans management loi complain korise kintu beshi fans show enjoy korise. Event tou fireworks loi sesh hoise aru 75,000 pora beshi manuh Karan laga gaana te nachise.
Itu pichete tai Mumbai aru Pune te perform korise aru etiya next city khan te jabo. Singer next Chandigarh te March 14 te perform koribo. Itu pichete Indore, Bengaluru, Ahmedabad, Kolkata, Jaipur aru Lucknow te concert hobo. Tour tou sesh te Ludhiana te end hobo.
Add Comment