Udupi, November 12 : Police para Sunday din te koisey, Karnataka laga Udupi district te, ekjun ama aro tailaga 3jun chokra ke chaku marikina moraidisey. Etu parivar laga member khan tu taikhan laga ghor te murikina thaka paisey.
Police para kuwa hisap te, mujrim khan para ama aro duijun dangor chokra ke first moraisey aro jitya 12 years laga sobsey chutu chokra etu bhayanak ghotna huwa jag ate pungchisey mujrim khan para taikey bi moraidisey.
Jitya taikhan laga ghor osor te thaka ekjun parosi para hangama hoi thaka tu hunikina ki hoisey etu janibole bahar olaisey mujrim khan para taikey bi bhoi khilaisey. Etu maiki laga mother-in-law(mota laga ama) bi hamla hoi thaka homoitey chaku para mara laga jokhom khaisey aro tailaga ilaj kuribole nimitey taikey hospital te admit kurisey.
Udupi laga Superintendent of Police (SP) para etu ghotna ke confirm kurisiley. Tai para koisey, “ Aji, Nejar busti osor te, 4jun manu laga khoon hoisey. Haseena aro tailaga 3jun baccha ke chaku marikina moraidisey.”
Tai para koisey ki suru te investigation kora hisap te khoon kora laga maksat tu dushmani hobo parey koikina suggest kuri asey, hoilebi etu kotha tu hosa asey koikina confirm kuribole aro bhal para investigation kuri asey.
Senior police official khan para etu bi koisey ki taikhan laga ghor para eku kimti saman haranai, kuntu para etu mamla tu saman chor kora laga nohoikina alag laga asey koikina dikhai asey.
Tai para koisey, “Amikhan para 10 am fale etu parivar khan laga parosi para jankari paisey kun khan para etu murija manu khan ke hala gula kuri thaka hunisey. Amikhan para etu khoon kora laga picheyte ama nohoile baccha khan logotey dushmani asey naki koikina sai asey.”
Add Comment