Bengaluru, October 29 : Sunday din te Kerala laga Christian khan laga dhormic convention te bomb blast huwa picheyte, Kerala laga osor te thaka rajya Karnataka aro Tamil Nadu para taikhan laga police aro security agency khan nimitey alert hoikina thaka laga level baraidisey, khas kurikina border fale.
Karnataka laga sarkar para police ke border area khan te bhal para nazar rakhibole instruction disey aro police laga mojudgi bi baraidisey.
Officials khan para kuwa hisap te, sob entry point khan te Kerala para aha gari khan ke check kuribo. Kerala para Karnataka te jabole karney 7ta dangor aro 7ta chutu entry points asey aro etu sob jaga khan te bisi police khan ke duty te dhalidibo.
Karnataka laga Home Minister G Parameshwara para koisey, “ Amikhan para police khan ke ekta alert message pathaisey. Amikhan logotey kun para Kerala te etu bomb blast kurisey aro etu kinaka hoisey etu laga jankari nai. IG aro Commissioner ke Mangaluru border ke nazar rakhibole laga instruction disey.” Kerala-Tamil Nadu border fale bi security tight kurikina asey. Kerala laga osor te thaka Tamil Nadu laga Kanyakumari district laga Church khan te bi extra security dhalikina asey.
Police khan bi Coimbatore aro Tensaki district te gari aro post khan ke bhal para check kuribole koisey.
Kerala police para bi etu bomb blast huwa picheyte rajya te security baraidisey. Police para agey barikina social media (whatsapp, instagram, twitter, facebook) te osor para nazar rakhibole suru kuridisey aro judi social media te eku olta polta post kurisey koiley taikhan laga against te kanooni action lobo koisey.
Sunday phujur te, Kerala laga Kalamassery te Jehovah’s Witness laga convention te 3ta bomb blast huwa te ekjun maiki murisey aro 40 opor manu jokhom khaisey. Kunba jokhom kha manu khan laga halat tu biya condition te asey koikina jankari paisey aro komsikom 10 jun manu laga gao 50% para bisi julisey.
Kerala laga ADGP (Law and Order) MR Ajith Kumar para koisey ki Dominic Martin koikina ekjun manu para etu bomb blast tu tai para kora asey koikina dawa kurikina nijor ke surrender kurisey. Police para tailaga etu kotha tu hosa asey na nai verify kuri asey.
Add Comment