Thiruvanathapuram, November 6 : Kerala laga ekta court para Monday (November 6) te Kochi bomb blast case te mujrim laga 10 din police custody grant kurisey. Principal Session Court laga Judge Honey M Varghese para police laga mujrim Dominic Martin ke 10 din nimitey taikhan laga custody te rakhibole laga request te izazat disey. October 29 te Kerala laga Kalamassery jag ate thaka ekta convention center te Jehovah’s Witness laga ekta prayer meeting chuli thaka homoitey bomb blast huwa te 4jun manu murisey aro 50 opor manu jokhom khaisey.
Police para court te etu submit kurisey ki taikhan para Dominic Marin para kinaka poisa kamai, tailaga videshi connection aro etu logotey jurikina thaka mamla khan ke investigate kuribole lagey. Police khan para etu bi koisey ki etu mujrim ke sabut jama kuribole nimitey kunba jaga khan te loijabole lagibo. Mujrim Dominic Martin para aro ekbar tailaga modod nimitey kanooni lawyer laga modod lobole mana kuridisey. Poila, October 31 te Martin ke kanooni custody te rakhisiley.
Indian Penal Code (IPC) (Punishment for murder) laga Section302 aro Explosive Substances Act laga Section 3 logotey etu mujrim laga khilaf te Unlawful Activities Prevention Act (UAPA) laga kunba section khan bi lagu kurisey.
October 29 te bomb blast huwa laga olop ghonta pichyte Dominic Martin para nijor ke surrender kora picheyte police para Martin ke formal tarika para arrest kurisey. Surrender kuribole laga olop ghonta ageyte, Martin, kun para nijor ke Jehovah’s Witness laga ex member thakisey koikina dawa kurisey tai para online te bomb blast kora laga karon tu samjhaikina ekta video post kurisey.
Add Comment