Obesity(bisi mosto hoija nohoilebi gao dangor hoija) tu etya khali amir aro alchi manu laga problem nathaka hoisey. Etu toh society laga sob section aro jaga te gusikina asey, seher para loikina busti taak. Etu laga jawab te, Prime Minister Narendra Modi para manu khan ke tail bisi thaka kha-luwa bustu kha komti kuribole request kurikina ekta campaign suru kurisey. Etu campaign te famous manu khan ke manu khan majotey healthy adat promote kuribole di asey. Etu tu ekta bisi bhal idea asey, hoilebi bisi government campaign nisna, etu campaign bi ekta slogan hey thakijabole nisna asey.
Nagaland te, kotey kha-luwa laga adat tu joldi-joldi change hoi asey, obesity laga mamla tu aro bisi dikhibole pari asey. Poila laga homoitey, khana te mangso aro fats bhorta thakisey, hoilebi physical activity aro active lifestyle para etu ke balance kurithakisey. Etya, town aro seher khan barithaka nimitey aro fast-food company jaiseki KFC, McDonald’s, cafes aro restaurant khan bisi-bisi hoija nimitey, kha-luwa laga adat bi change hoijaisey. India laga alaga lag state aro dusra desh para bi influence hoikina etya bisi kisim laga kha-luwa bustu available asey. Hoilebi etu logotey subidha te aro ekta change ahisey. Etu changes tu processed khana(khana laga taste colour khan improve kuribole nimitey ki-ki dhalikina etu ke modify kora), bisi portion aro hila-hili komti kora khana sey. Obesity, kuntu ekta homoitey rare(eman nuhuna aro nuhuwa laga) thakisey, etu toh etya common hoijaisey.
Hoi yatey aro alag change bi ahi asey. Nagaland laga sob town te gym ahi asey aro bisi jawan manu khan fitness ke serious loi asey. Olop din ageyte huwa Nagaland Street Fitness event laga 10th edition te Nagaland laga alag alag jaga para competitors khan participate kurikina dikhaisey ki physical culture(fitness, exercise te focus kora laga lifestyle) bi bari asey. Gym ja, kuntu toh ekta chutu hobby nohoilebi trend nisna suru hoisiley etu para etya bura-buri khan ke bi influence kuriasey, bisi manu khan nimitey gym membership aro special diet(gym ja manu khan para khabole lagiya bustu khan) bisi daam huwa laga bawajut bi.
Aro yatey duita olta mamla olai asey. Ekta faley, fast-food(bahar laga healthy nathaka khana) aro alchi laga adat khan spread hoiasey aro dusra faley, fitness movement bi mashoor hoi asey. Etu duita tu ekdam alag duniya para aha nisna asey- first wala(fast-food) tu asani aro sosta para paijai aro second wala(fitness/gym) tu khali homoi aro poisa thaka manu khan hey pabo parey.
Manu khan ke tail bustu kha komti kuribole request kora laga campaign tu etu mamla ke thik kuribole naparibo. Healthy nathaka kha-luwa bustu tu sosta aro asani para paithaka taak aro healthy choice tu asanipara available nuhuwa taak, obesity tu bari thakibo. Exercise te . Public area te berabole aro exercise kuribole nimitey jaga nathaka taak aro ajikali laga kaam te bisi ghonta buhithakibole lagiya la situation te gym hey ekta opai asey, hoilebi sob manu para gym jabole afford kuribo naparey.
Asol change anibole mon asye koiley, healthy choice asaani para available kuridibo lagey. Maney, seher aro town khan laga planning bhal para kuribo lagey, food quality te kara nyom lagu kuribo lagey aro public jaga khan te phusical activity(eaxercise khan) support kuribo lagey. Etu matlab, health ke khali nijor laga zimidari nohoikina samaj laga problem nisna treat kuribo lagey. Nohoiley, campaign khan tu ahibo aro jabo, aro obesity tu bari thakibo. Aro khali kunba poisa thaka manu khan hey fit thakibo paribo.
Add Comment