Khor na-thaga manu pora Spanish golfer ke moraidese

Chicago, 19 September: Tuesday din lowa laga police pora janaideya toh, ekta khor na-thaga manu pora champion Spanish college golfer Celia Barquin Arozamena logode moraideya karni thuri kena ase koise. Monday morning Goldwater Golf Links jaga de staff khan pora 22-sal ke powah thakise. Tuesday din Ames police commander Geoff Huff pora news conference de kowah toh, maike laga body toh number nine tee box laga next pani-pethor de paise kowah thakise. Huff pora etu maike laga opor torso, matha aro gola ke kadi (stab) kena ase koise. Etu hamla howah toh, 9:30 aro 10:am majode din phalli hoise koise. Police khan pora etu hamla toh Colin Daniel Richards pora korise koi-kena jani-paise aro tai ke first-degree murder pora bodhnaam kori kena ase. Tuesday din judge pora be tai ke USD 5 million bond de jail saja honaidese. Police laga hesab de, Richards toh khor na-thaga manu ase aro tai woods osor de thaki koise. Tusara khor na-thaga manu pora police khan logode koi-kena thaga toh, Richards pora rape kori-kena maike khan ke moraide kowah thaise. Huff kora kowah toh, Police khan pora Richards laga kabura (cloth) khun lagi kena thaga paise koise. Hoilebe DNA test result toh etya tak kora-nai koise.