December 07, 2024, 07:44 PM : Itu muhina laga District planning aru development board meeting, itu ‘Advent Christmas’ laga celebration logotey milai kena loishey, 7th December, 2024 tey, Zinki Quarry road kiphire tey, Tutheze Village para host kuri kena.
Shuru shuru tey, Deputy Commissioner Kiphire, Temsuwati Longkumer para Advent Christmas greeting khan share kurishey, itu jama kuria manu khan ke. Tai para Tutheze Village ke thanks janaishey, tai khan laga time, space diya nimitey aru itu grand programme toh host kuria karney. Itu DC para itu teenta retire hoboley thaka officer khan ke bhi wish kurishey, itu district laga, kun khan toh hoiley – Akok Toshi, Project Director DRDA, Panda, DEO education aru Tanzil, DIO NIC asey, ekta bishi retire hoi kena thaka jeevan thakiboley.
Temsuwati para itu sob departmental head khan ke yaad dilaishey, bhal para tyaar thakiboley aru ready thakiboley, tai khan laga developmental activity khan, project khan logotey, report kuriboley, itu Union Finance Minister para visit laga homoi tey, itu district tey.
Itu notun DPDB laga member khan toh hoiley – Zavito EAC Kiphire, Senti Wabang, SDPO aru Khruosutho, Commandant 14th NAP (IR) Battalion, Kiphire khan ke introduce kurishey, itu board ke.
Itu Advent Christmas program laga homoi tey, Albert Jingru, Leochum Thonger, Lethe Khing aru Daniel para special ganna present kurishey, aru itu jama kuria manu khan ke entertain kurishey. Talent thaka laga board member khan, DC – Temsuwati para chulai jai kena, aru alag khan bhi part loishey ganna khan kuria tey. Invocationlaga prathana toh hoiley Lipichem Sangtam, DPO Land Resources para pronounce kurishey.
Add Comment