Kiran Bedi laga jibon te film banabole asey

New Delhi, June 12 : Biopics khan tu manu khan ke bhal kaam kurikina dangor huwa manu khan laga life laga kahani kobole aro taikhan ke inspire kuribole laga bisi bhal tarika asey. Etya, India laga first maiki IPS officer Dr. Kiran Bedi laga opor te bi ekta biopic(jibon kahani dikha film) banabole asey. Film sa manu khan para joldi hi screen te Kiran Bedi laga jibon dikhibole asey. Tuesday din te, etu film laga makers khan para ekta video release kurikina etu film laga announcement kurisey. Etu film laga naam ‘Bedi’: The Name You Know, The Story You Don’t’ rakhisey. Kiran Bedi nijor para bi etu video launch kora homoitey media ke kotha kora homoitey etu jankari disey. Tai para koisey ki tai para tailaga jibon laga opor te film banabole laga offer bisi bar paisey, hoilebi taikey enaka lagisey ki etu laga sahi homoi tu etya asey. Kiran Bedi para tailaga jibon kahani te film banabole tu director Kushal Chawla para etu film nimitey char(4) saal adha research kora tu dikhikina manisey. Tai para koisey jitya Kushal aro tailaga baba Gaurav Chawla para tailaga opor te film banabole mon asey koikina taieky koisey tai tu utu homoitey duty nimitey Pondicherry te thakisey. Etu te, Kiran para koisiley ki tailaga opor te etya film banabole bisi joldi asey kilemaney tai etya tak bi kaam kuri asey. Hoilebi Kushal aro Gaurav para tai accha kobo na nai etu najanikina already bisi research kuriloikina thaksiey. Jitya Kiran ke kuntu actress para tailaga character ke bhal para dikhabole paribo etu hudisey, tai para koisey ki etu tu kobole mushkil asey aro etu laga kaam tu director aro producer khan laga opor te chara bhal hobo. Kiran para agey barikina koisey etu film tu aha saal, International Women’s Year laga 50^th anniversary te release hobo.