KLBC D Block Para World Sunday School Day Celebrate Kurishey

November 03, 2024, 05:09 PM :  Kohima Liangmai Baptist Church para World Sunday School day celebrate kurishey, 3^rd November 2024 tey, tai khan laga Church laga premises tey para. Itu occasion tey, Mr. Cherakung Zeliang para tatey jama kuria biswasi manu khan ke encourage kurishey, tai tatey resource person buhi kena, itu Word Sunday School Day laga Occasion tey. Tai para state kurishey ki, Sunday school toh hoiley utu jaga asey kotey bacha khan tai khan laga first stage khan asey itu Bible ke bujiboley karney. Resource person Cherakung Zeliang para koishey bacha khan age laga hisap tey tai khan ki janiboley lagi asey utu hisap tey lesson khan purai, tai khan itu gyan pai loi itu kahani khan shikha laga hisap tey aru ki ki kuriboley lagey nakuriboley lagey utu sacred text para. Resource person para koishey itu foundational gyan toh hoiley ground work asey, ekta majbut Christian faith nimitey aru itu Sunday school toh hoiley itu bacha khan nimitey jaga asey, tai khan laga bisas toh banaboley aru Community laga connection banaboley laga. Itu Kohima Liangmai Baptist Church laga Sunday school department para alag alag item laga presentation khan organize kurishey, itu church tey, action song, Bible recitation, group song khan nishina. Sunday school Department Kohima Liangmai Baptist Church para acknowledgement laga gift bhi present kurishey, itu sob Sunday school bacha khan ke, tai khan laga active attendance nimitey aru kotha khan manna nimitey.  Sunday school Superintendent Mrs Phungben Kaurintta para World Sunday school day laga event ke preside kurishey. Itu World Sunday school day celebration laga occasion tey, itu church para khotom hoi jawa pichetey refreshment khan dishey aru itu programme toh hoiley successful para khotom kuriboley parishey.