TB Mukt Bharat initiative laga under te 100-day TB campaign laga his ate Deputy Commissioner’s office, Kohima laga Conference Hall te TB opor te ekta Awareness cum Screening Programme conduct kurisiley. Etu campaign laga aim tu diagnose nohoikina thaka case khan ke identify kuribole laga efforts tu speed kuridikina, TB paikina mora tu kom kuribole aro ekta strategy laga through para nutun infection pabole para bachaidibole laga asey.
Deputy Commissioner of Kohima, Kumar Ramnikant, IAS para keynote speech diya homoitey tuberculosis (TB) laga bari te jankari feilabole laga urgent jarurat thaka laga kotha te jor disey. Tai para TB tu ekta “silent killer” asey kuntu ke bhal para test nukurisey koiley dhuribole naparey koikina tai para koisey ki etu bimari laga ilaj tu asey hoilebi etu laga eman jankari nathaka para etu bimari ke khotom kuridibole te badha ahi asey. T ai para etu programme attend kora manu khan ke etu bimari laga bari te jankari feilabole te active role lobole binti kurikina koisey, “Kosom luwa laga eku matlab nai jabtak amikhan sob para amikhan laga parivar, sathi aro neighbours taak information nupungchai. Sob manu para milikina himat dikhaisey koiley hey amikhan TB tu khotom kuridibo paribo.”
District TB officer, Dr. Chibenthung Kithan para tailaga speech te TB tu ekta dangor public health challenge asey koisey. Tai para koisey ki ekjun ilaj nukurikina thaka TB pa manu para ek-saal te 10jun manu ke infect nohoilebi etu bimari transfer kuridibo parey. Aro duniya te India logotey sobsey highest TB burden asey. Duita kisim laga TB, TB-Pulmonary aro Extra-Pulmonary ke explain kurikina tai para TB ke joldi detect kora aro joldi ilaj kora laga importance janaisey. Tai para etu bi inform kurisey ki etu 100-day TB campaign tu Nagaland te December 7 te launch hoisiley. Kuntu te busti, town area aro government office khan te TB screening camps aro awareness programs khan conduct kurisey.
Dr. Chiben para Nikshay Mitra initiative laga bi kotha koisey, kuntu para TB patient khan ke support kuribole nimitey community ke participate kuribole encourage korey. Etu initiative under te, donation diya manu, kun khan ke Nikshay Mitras koi, taikhan para TB patient ke treatment chulithaka homoitey nutritional support dibole, taikhan laga sorom komti kuridibole aro poisa laga bojh komti kuridibole nimitey adopt korey. Etu initiative laga aim tu TB laga khilaf te larayi kora te society involve kora tu barabole aro patient khan bhal care aro support pabole laga asey.
Community laga participation tu bisi jaruri asey koikina aro TB ke milikina khotom kuridibole haath milabole request kurikina, Dr. Chiben para wapas dohraisey ki medical department ekla para TB khotom kuridibole naparibo aro sob manu ke milikina action lobole koisey.
Etu programme ke Deputy Commissioner’s office laga sob officer aro staff khan para attend kurisey. Etu event laga his ate, sob programme attend kora manu khan nimitey ekta free TB testing camp organize kurisey.
Add Comment