Kohima te Telecom nimitey Right of Way portal aro online Inner Line Permit te training rakhisey

20 February 2025 te Telecom unfrastructure nimitey Right of Way (ROW) portal laga online system aro online inner line permit (ILP) system te training diya laga inauguration programme hoisey. Etu programme tu Directorate of Information Technology & Communication, Kohima laga Conference Hall te hoisiley. Kuntu te Nagaland laga Home Commissioner Vyasan R. IAS  special guest thakisey.

Etu programme te kotha kuwa homoitey, Vyasan para inform kurisey ki district level te Information Technology & Communication laga office nathaka nimitey tai para sob trainees khan ke manu khan laga seva kuribole nimitey etu laga kami pura kuribole karney extra role nibhabole koisey. Tai para sob trainees ke etu jaga laga service providers(internet service diya company) logotey bhal contact rakhibole koisey taki tatey laga network bhal hobo. Tai para koisey Right of Way (ROW) para telecom company khan ke sob jaruri permission aro approval nimitey ekta single platform diye. Aro koisey ki ROW laga policy khan clear nathakisey koiley aro asan nohoilebi smooth nabanaisey koiley internet connectivity project khan delay hoijai aro internet service bi biya hoijai.

 Information and Technology & Communication laga Commissioner & Secretary, Mohammed Ali Shihab, IAS para koisey ki Nagaland te enaka 397 busti asey kotey mobile tower nai. Aro inform kurisey ki Government tu 4G network dibole nimitey pura kosis kuriasey. Tai para sob participants khan ke dhyan dikina alag alag network issue laga problem ke bujibole koisey, taki jitya taikhan nijor laga district te wapas jabo taikhan laga area te chulithaka problem ke saidiya te improvement anibo. Tai para my Bharat net laga importance te jor dhalibole koisey, kuntu toh internet laga future ke tagra banabole nimitey ekta tagra technology asey. 

Nagaland laga 17 districts Administration laga officials khan para etu dui din laga training attend kuriasey kuntu ke Directorate of Information & Technology and Communication para Kohima te host kurisey. Etu training schedule te, Online Inner Line Permit System laga training, Right of Way laga training aro telecom nimitey RoW te practical training diya, shamil asey.