Kolkata doctor rape-murder case deh Mamata Banerjee laka dangor promise

August 12, 2024: West Bengal chief minister Mamata Banerjee para Kolkata laka RG Kar Hospital deh hua postgraduate trainee doctor laka murder aro rape case deh police kan Sunday din para solve kuri bole napareh koile tho, Central Bureau of Investigation (CBI) keh di dibo kui shae. “Sunday din para police kan para case tho solve kuri bole napareh koile tho, mukan case tho CBI keh di dibo. Hoile b central probe agency alka success rate tho bishi komti ase,” PTI para Banerjee keh quote kuri nah kui shae. Doctor laka brutal rape aro murder case laka upor deh protest tho itia b jai ase. RG Kar Medical College aro Hospital laka principal Sandip Ghosh tho taila post aro government service para resign kuri di shae. “Mui etu insult tho aro lubo napareh. Muila against etu allegations kan sob false aro fabricated ase. Mui keh hat abo karne ekta student movement keh incite kuri nah ase. Etu laka pichae deh ekta political mind ase. Incident hui nah ekta kanda pitor deh mui police keh janai di shae. CCTV footage kan tho police kan keh di nah ase,” Ttai para PTI keh kui shae. Mamata Banerjee para accused laka against death penalty seek kuri bole kasam kuri shae. Tai para taila government kan ekta CBI probe karne eku objections nataki bo kui shae, students kan demand kuri shae koile tho. “Taikan West Bengal laka government keh biswas nakureh koiel tho, taikan kushi investigating agency keh approach kuri bole pari bo.; mukan lokot deh ekta b objection nai,” tai para kui shae.