Kurnool:
Thursday fusur te bus aro truck laga nimite teenta manu murishe. Manu mura majote duita drivers ase aro ekta manu toh passenger thakishe. Truck toh iron rods bhuki kena thakishe. Ghatna toh Chinna Tekur bosti te hoishe. Bosti toh Kurnool city para ekdam dur te ase.
Ullindakonda sub-inspector G. Gopal Reddy koishe bus toh SRS travels laga ase aro bus toh Hyderabad para Bangalore te jai thaka samay te truck logote lagishe. Truck te thaka iron rods toh bus te ghusishe. Murija drivers laga naam toh Chandrasekhar aro Krishna ase aro ghatna te mura passenger laga naam toh Satish ase.
Police koishe ke etu ghatna te egarota (11) manu khan toh bishi jokom hoishe. Jokom huwa manu khan ke Kurnool Government General Hospital te admit kurishe.
SI koishe ke jokom huwa manu khan laga conditions toh ekdam critical ase.
Sub-inspector Gopal Reddy koishe ke truck laga driver ke dhuribole para nai. Truck toh Karnataka state laga thakishe.
SI koishe truck te driving kagos (paper), nohoile bhi registration certificate khan eku bhi paa nai. Registration number duwara truck laga malik aro driver ke besari ase.
District Collector S Satyanarayana toh hospital te visit kurishe aro jokom huwa manu khan nimite medical care kuribole bondobos kuribole koishe.
Add Comment