June 12, 2024: Kuwait laka southern Mangaf district deh ekta jui para kom seh kom 35 manu keh murai di shae, state-run Kuwait News Agency (KUNA) laka isap deh. Jui tho Wednesday morning deh shuru hui shae aro pura building kan keh julai di shae. Jui tho aro phat phat spread hui jah tho manu kan bishi keh pasai di shae.
Kuwait deputy prime minister para 41 jun muri jai shae kui shae etu incident deh. Onmanorama laka isap deh, mura manu laka majo deh pastha tho Keralites taki shae kui shae. Report isap deh building deh 195 labourers kan taki shae. Tateh Kerala aro Tamil Nadu para aha kam kura manu kan taki shae. Onmanorama laka isap deh, building tho NBTC group laka taki shae kuto Malayali businessman KG Abraham own kureh.
External Affairs Minister S Jainshakar para tai shock deh ase kui shae aro Indian ambassadors kan camp deh jai shae kui shae.
“Kuwait laka city deh ki hui shae, etu kobor deh mui shock deh ase. Report isap deh 40 laka upor manu kan muri jai shae aro 50 laka upor manu kan keh hospitalize kuri di shae. Mukan laka ambassador kan camp deh jai nah ase. Mukan aro information kan pabo leh rukhi ase,” Jaishankar para X deh post kuri shae.
KUNA Para jui tho control deh ani di shae kui shae aro authorities kan jui kinaka shuru hui shae, etu jani bole evidence kan bisari ase kui shae.
Add Comment