Laapataa Ladies ke Oscars nimitey India laga entry chunisey

New Delhi, September 23 : Kiran Rao laga Laapataa Ladies ke Oscars 2025 nimitey, India laga official entry karney chunisey. Etu announcement tu Film Federation of India para Monday din te kurisey. Etu Hindi film tu patriarchy(ekta samaj kotey mota khan takat dhorey) te halka pulka majak nimitey bana laga sey. Etu film ke 29 film laga list para chunisey, kuntu te Bollywood hit film Animal, Malayalam National Award winner Aattam aro Cannes winner All We Imagine As Light bi shamil thakisey. 13 member thaka select committee kuntu laga head Assamese director Jahnu Barua asey, taikhan para Aamir Khan aro Kiran Rao para produce kora film Laapataa Ladies ke Oscars Academy Awards laga best international film category te pathabole chunisey. Tamil film Maharaja, Telugu film Kalki 2898 AD aro Hanu-Man aro Hindi film Swatantraya Veer Savarkar aro Article 370 bi list te thakisey. Juwa saal Malayalam superhit 2018 : Everyone is a Hero pathaisiley. Recently, KIran para koisiley ki Film Federation of India (FFI) para best film pick kuribole asey. Laapata Ladies tu 2001 laga India laga busti  fale thaka duijun dulhan(nutun shaddi huwa maiki) laga mon khusi kuridiya aro hosla baraidiya kahani asey kun train te journey kuri thaka homoitey golti para exchange hoijaisiley. Etu film ke Kiran Rao laga Kindling Productions aro Aamir Khan Productions para produce kurisiley. Etu film tu, etu saal laga March moina te release hoisiley aro critics(film ke judge kora manu khan) para duniyabhor para tarif paisey. Etu film te Nitanshi Goel, Pratibha Ranta aro Sparsh Shrivastav lead role te thakisey aro taikhan logotey Ravi Kishan, Chhaya Kadam aro Geeta Aggarwal Sharma bi thakisey.