Landslide Aru Massive Flood Hoa Para, Dozen Nishina Manu Khan Ke Murai Dishey, Brazil Tey

May 05, 2024: Massive flooding aru landslide khan hoa nimitey, pani bishi gira para, Brazil laga southernmost state khan tey, 55 manu khan ke murai dishey, tatey laga local authority khan laga hisap tey. Official para koishey, aru bhi 74 manu khan toh hari kena asey, Rio Grande do Sul tey. Komti koiley bhi 25,000 manu khan toh opoai nathaka ki kena tai khan laga ghor khan chariboley lagishey, kitya para itu storm toh shuru hoishey, jawa Saturday tey para. Komti koilebi adha -million manu khan toh hoiley power aru sapha pani nathaki kena thakishey, aru bhi pani khan giriboley kaga expect kuri kena. Rio Grande do Sul laga civil defence para koishey 55 manu khan mura toh hoiley confirm kurishey, itu flood khan logotey link thaki kena, aru itu homoi tey, saatta manu muria toh hoiley investigate kuri asey, janiboley karney utu toh hoiley itu flood nimitey asey na ki karney asey koi kena. Itu 497 city khan laga half para bhi bishi toh hoiley affect hoi kena asey, itu storm khan aha nimitey, raasta khan aru bridge khan toh biya kuri di kena, tatey laga bishi area khan tey.