Ekta dangor documentary karone, actor aru environmental activist Leonardo DiCaprio ke rare public appearance te dekhi se juntu time te tai samundar para plastic waste uthai se. Kintu internet to full support diya na, konba manu tai laga private jet use kura ke criticize kurise, tai laga environmental image ke question kurise.
Leonardo recently Spain laga Formentera coast te dekhi se, juntu time te tai ekta group baccha logot milikena plastic waste collect kutise ekta environmental documentary karone.
Oscar-winning actor DiCaprio clear pani te baccha khan logot swim kuri kena, plastic collect kurise. Etu effort to ekta notun environmental documentary part ase juntu endangered seagrass species ‘Posidonia oceanica’ ke highlight kuribo, jun Mediterranean ecosystem karone bisi important ase.
Tai laga etu outing laga bisi photo social media te circulate kurise. Kunba photo te dekha jai tai samundar te dive kura, documentary team logot bisi serious discussion te ase, aru kunba photo te dekhi jai tai baccha khan logot samundar te ja.
Leonardo laga etu beach cleanup activity social media te ekta debate suru kurise. Kunba fan tai laga effort ke appreciate kurise, kintu alak manu criticize kurise tai laga private jet chula karone, aru tai laga carbon footprint ke notun divisive conversation start hoise.
Ek jon comment te likhi se, “Tai laga yacht para pollution clean kuri ase naki?” aru ekjon likhise, “Private jet te aha age na, piche?”
Alak comment khan ase: “Tai laga mega yacht loi ahise naki?”, “Private jet te ahise naki?”, “Bro laga yacht to wait kuri ase aru side te ase”, “Private jet te ahi ocean clean kurise naki?”, “ Tai laga Carbon footprint toh ki ase?” aru “Sure ase tai laga mega yacht ke frame para bahar rakha ase.”
Ek jon social media user likhise, “Tai laga carbon footprint to dinosaur size ase, eneka te to bisi ironic lagise.” alak ekjon likhise, “Ocean para plastic uthai ase, kintu private jet loi ahi se.”
Ek jon outright likhise, “Eku respect nai hypocrisy eneka blatantly face te.”
Kunba manu support bhi dise. Ekjon likhise, “Tai to real heart of the ocean ase,” aru ekjon likhise, “Tai laga environmental effort to elite ase, comment khan nai.” Aru ekjon likhise, “Tai to ekta special soul ase.”
Etu sal laga aage bhi Leonardo criticism face kurise juntu time te tai LA fire para private jet te model Vittoria Ceretti logot escape kurise. ‘Tribune’ report hisap te, Leonardo ke dekhi se private jet te jabo laga time te, aru tai ke Mexico laga Cabo San Lucas land kuribo time te dekhi se. Etu move para tai ke aru criticize kurise, tai laga ‘climate warrior’ image ke question kurise. Backlash opor tai announce kurise $1 million donate kuribo karone LA County te chola wildfire relief aru recovery effort ke support dibo karone.
Add Comment