LGBTQ Community nemite Section 377 hataidese

NEW DELHI, SEPTEMBER 6 : Aji Supreme Court pora dangor kotha ekta manaidese. Etubi Section 377 toh Indian Penal Code (IPC) laga bitorte mana kena thaka pora hataidebo koi kena.Etu Section 377 toh boila British Colonial time porahi ula laga ase. Aro etu ulai kena 158 sal huikena ase. Aro etu Section 377 toh Lesbian, Gay, Bisexual, Transgender aro Queer (LGBTQ) Community kan nemite ula laga chis ase. Etubi etu LGBTQ kan ke Homosexual toh kuribo nabaribo koi kena. Aro Section 377 te bi kun moda, maiki aro janwar ke huilebi latera-batera (carnal intercourse) kam kuri etu kan ke etu 10 sal jail te thalidebo koi kena kotha manai kena thakise. Etubi 1861 laga kanoon hisabte. Etu LGBTQ Community hisabte bi etu Section 377 ula laga naam pora bhutani kurikena (over advantage) tai kan manu (LGBTQ members) logot police kan pora besi maribole kuri aro diktar debole kuri kena thakise koi kena janaise.Etu karne etu hataidebole karne boila 1991 sal porahi suru kurikena 1994, 2001, 2004, 2006, 2009, 2013, 2016 aro 2018 dak kotha ulai kena thakise. Huilebi kotha manabole nakuri kena aro nabari kena thakise.Huilebi aji pora Supreme Court pora etu Section 377 toh hataidebole kotha ulaise. Kele etu section 377 toh ekta bhal nathaka (irrational and arbitrary) chis ase. Aro etu Section 377 boila mana pora ulta etu LGBTQ manu kan laga jeevan te besi diktar de aro tai kan laga bhal babuna nesena thik te thakibole nabara hui koi kena Chief Justice India, Dipak Misra, Justices Rohinton Nariman, AM Khanwilkar, DY Chandrachud aro Indu Malhotra kan kotha melekena khoborte janaise. Etu hataidebole mana karne besi jun kobi Legal Experts, United Nations aro tusera kan pora khushi kotha janaide thakise. Aro etu hataidebole kura toh ekta bhal kotha kahani te thakibole laga ase koi kena janaide thakise.