Loan Laga Scam Karney, Duijon Manu Ke Arrest Kurishey

November 03, 2024, 06:18 PM : Dimapur laga police para toh hoiley duita maiki ke arrest kurishey, manu khan ke phasai thaka nimitey, itu loan khan dibo koi kena. Ekta press release tey, Dimapur police Pro para inform kurishey ki, itu duita accuse toh hoiley Sungty Tungoe alias Awala aru Chipeno Murry asey koi kena chiniboley pari asey, kun khan ke toh hoiley enquiry karney matishey, khobor khan dikhi pawa pichetey, alag alag social media khan tey. Itu enquiry laga homoi tey PRO para koishey itu duijon toh hoiley admit kurishey ki, tai khan toh hoiley alag alag bishi manu khan ke loan khan dishey koi kena, kunba security amount khan loi kena aru tai khan toh hoiley kiba deed khan laga agreement khan banaishey government stamp paper khan tey, charta register kuri ne anathaka society khan laga naam tey para – Limuqho Society, Royal Society, Niquomi Society aru Rural Society laga naam tey. Aru bhi agey enquiry kuria laga homoi tey, PRO para koishey itu toh hoiley ascertain asey, ki, utu charta society toh hoiley, nai aru itu duijon toh hoiley fraudulent para tai khan laga agreement deed toh hoiley kuri jai thakishey. PRO para koishey alag alag bishi victim khan toh hoiley aru bhi loan laga poisa toh paboley baki asey, security amount deposit kuria pichetey.