Longleng, 20 February: Wednesday din Nakalempon, Longleng jaga te Rehabilitation and upgradation of Longleng – Tuenasng Road toh Special Guest nemide Minister for Health & Family Welfare, Nagaland S. Pangnyu Phom thakikena suru korise.
Chang aro Phom community para cooperation aro support deshe janaikena Pangnyu Phom para Tuensang aro Longleng district pithor laga 19 village laga mathi malik, NGOs aro civil societies ke project joldi kothom hobo nemide full support aro cooperation debole koise. Tai para be department aro contractor ke manu khan aro eku dekthari nadikena mathi deya malik khan logode phal para mela-meli thakibole janaishe. Tai para be sob manu laga shaat para rasta toh sob Nagas nemide ekta model obole biswaas howah janaishe.
Rasta toh manu laga social aro economic development nemide ektum kaam howah janaikena tai koise, Longleng to Tuensang tak rasta aro repair kora para khali tuita district ke he laab powah nohoikena Mon aro Noklak laga manu ke be eki laab toh pabo. Tai para be Longleng toh ekta gopal district ase koise kelay koile tinta National Highway joldi connect hobole thaka nemide. Etu para tai manu khan communal nohoile party line laga past difference nasai kena humble hobole aro unity nemide agae ahibole koise kelay koile ahibole din development lobole nemide. Pangnyu para be district administration, Police aro village councils ke sob chamela toh project te eku dekthari nakorikena phal para kothom kuribole janaishe.
Deputy Commissioner, Longleng M. Shayung Phom, The ADC Tuensang Ajit Verma IAS aro Rev. Dr. L. Anjo Keikung para be kotha kora thakise. Project opor te A. Pongshi Phom para olob janaideya thakise aro Er. Limanaro Chief Engineer PWD (R&B) para be department laga side para project opor te olob janaideya thakise.
Welcome address toh Shamloi Phom Chairman Hukphang Village council para landowners laga behalf te koise. Programme toh Er. S.B. Angh Executive Engineer PWD (R&B) Longleng para vote of thanks koikena kothom korise. Etu bechide Rev. Beau Pastor Longleng Toiwn Baptist Church para benediction prathana korise. Programme te chaired toh Er. Khahuli Sema Addl. Chief Engineer Tuensang Zone thakise.
Project toh North East Road Sector Development Scheme (NERSDS) NEC pithor te fund kora laga ase. Lanching program te district administrations, alak alak departments, NGOs, Civil Societies, village councils, Landowners aro Longleng aro Tuensang district laga general public ahiya thakise.
Add Comment