Madhya Pradesh te 3,000 Doctors resign hoishe

Bhopal: Thursday din Madhya Pradesh High Court para koishe ke, state te junior doctors strike kori thaka toh 24 gonda pithor te tai khan laga kam soruh koriboli janaishe. Hoilebi, tai khan para kotha naloikena 3,000 neshina khan kam para resign korishe aro etu fesla toh challenge koriboli janaishe. Court para 4 din strike kori thaka toh ‘illegal’ ase koishe. State laga 6 government medical colleges te 3,000 junior doctors para resign korikena Thursday din tai khan laga resignations toh nejor colleges dean logot submitted korishe, koikena etu khobor toh Madhya Pradesh Junior Doctors Association (MPJDA) president Dr Arvind Meena para janaishe. Etu strike toh Monday din te soruh hoishe aro doctors laga demand napa dak jai thakibo koishe. Junior doctors para besi paar state government logot demand neshina stipend othaboli aro doctors aro tai khan laga ghor manuh logot jodi coronavirus para bemar hoile free elaj thiboli koikena ase. Mr Meena para koishe ke, Medical Officers Association laga members aro Federation of Resident Doctors Association para be tai khan laga strike te samil koribo. Tai koishe, , Bihar, Chhattisgarh, Uttar Pradesh, Karnataka, Telangana, Bihar, Maharashtra aro AIIMS Rishikesh aro etu oper te dosura manuh para be strike samai motob koriboli janaishe. Mr Meena para aro koishe ke, May 6 darik te government authorities para tai khan laga demand toh thiboli promise korishe, hoilebi itya dak eku khobor nai, etu nemite kam bondh koriboli olai ase. Etu din akhe te, Jabalpur High Court para koishe ke, JDA para state pura te strike kora toh illegal ase, etu nemite junior doctors logot Friday 2:30 PM samai dak te kam te jaboli janaishe. Division bench, Chief Justice Mohammad Rafiq Ahmed aro Justice Sujoy Paul para loikena koishe ke, jodi strike kori thaka doctors para samai deya hesab te kam nakorile, state government para tai khan oper te tangor action loboli junaishe.