Mumbai: Friday din Maharashtra te 11,766 coronavirus cases thurishe koikena khobor janaishe. Etu melaikena state te bemari cases toh 58,87,853 hoishe aro notun 406 mora melaikena state te 1,06,367 manuh morikena ase koishe. Etu din olop akhe te, state health department para janaishe ke, etu saak May 26 darik para koikena June 10 darik dak te sob melaikena Covid-19 bemar para 8,074 manuh morishe. Etu khobor toh revised kora beche ase aro purana khobor toh janai deya nai. April aro May moina te cases besi howa nemite, government machinery te besi tangor tik-tari hoikena konuba cases toh data recording kora samai thiri hoishe koishe. Itya dak te 8,104 bemar manuh bhal hoikena hospitals para discharged hoishe, etu melaikena 56,16,857 bemari manuh bhal hoikena ase aro active cases toh 1,61,704 te ase. Mumbai te aro notun 721 COVID-19 cases thura melaikena itya 7,14,216 cases ase aro 24 jun mora khobor paishe, etu samai 658 jun bemar bhal hoishe, koikena khobor toh Brihanmumbai Municipal Corporation para janaishe.
Sobse notun khobor hesab te city te manuh mora toh 15,079 hoikena ase aro 6,81,946 bemar bhal hoishe. Maharashtra te COVID-19 bemari bhal howa rate toh 95.4 per cent te ase aro etu samai mora rate toh 1.81 per cent te ase. Itya dak 10,04,770 manuh ghor te quarantine kori ase aro 6,024 jun toh institutional quarantine te ase koikena khobor toh janaishe.
Add Comment