Mumbai, January 03 : Sooraj Barjatya laga film Maine Pyaar Kiya tu Bhagyashree laga Bollywood te first film thakisey aro Salman Khan laga second film thakisey. Siddharth Kanan logotey kora ekta recent interview te, Upasana Singh para reveal kurisey ki etu film laga lead role nimitey tai first choice thakisey. Hoilebi tailaga heigh nimitey taikey luwanai.
Upasana para Mumbai pongcha picheyte etu film laga director Sooraj Barjatya ke lok kora tu yaad kurisey. Sooraj Barjatya para Upasana para audition diya picheyte Suman laga role nimitey taikey select kuribole laga confidence jataisiley. Upasana para enaka koisey, “Tai(Sooraj) para amikey etu film, anilaga role laga bari te sobkuch koisey aro tailaga side para ami etu role nimitey thik asey koisey hoilebi amikey aney ahikina tailaga baba ke lok kuribole koisiley.” Director Sooraj para taikey tailaga baba baba(Raj Kumar Barjatya) ke lok koraidisey aro etu picheyte situation tu alag hoijaisey. Raj Kumar Barjatya para etu role nimitey taikey approve koranai. Aro taikhan para etu faisla tu Upasana ke wapas call nukurikina janaisey .
Bisi saal picheyte, Rajshri Productions logotey ‘Main Prem Ki Diwani Hoon’ film te kaam kora homoitey, Raj Kumar Barjatya para public ke janaisey ki Suman laga role nimitey Upasana tu Ktaikhan laga original choice thakisey. Aro tai para Kareena Kapoor, Abhishek Bachchan aro Hrithik Roshan laga ageyte bi etu admit kurisey. Etu para sob ke asurit kuridisey. Upasana para utu homoitey eney majak kurikina Raj Kumar Barjatya ke etu role napa nimitey blame kurisiley.
Hoilebi, etu picheyte interview te Upasana para koisey ki Raj Kumar Barjatya para taikey reject kora laga asol karon tu tailaga height thakisey. Etu film bana manu khan tu Salman Khan para khata thaka heroine lagi thakisey. Tai para dhamali kurikina koisey, “Toh ami Maine Pyaar Kiya te role napa laga reason tu Salman Khan asey.”
Add Comment