January 05 : Ekey jaga para aha Liverpool aro Manchester United majotey match hobole thaka ageyte, Manchester United laga Portuguese coach Ruben Amorim para admit kurisey ki Anfield laga trip ahi thaka nimitey taikhan laga team tu biya halat te thakisey. Manchester United tu English Premiere League(EPL) te taikhan laga juwa 6ta games majotey 5ta games harisey. Aro etya taikhan laga mukabala table te top kurikina thaka Liverpool logotey hobole asey.
Amorim para tai Manchester United te aha homoitey kinaka thakisey aro etya lagatar harithaka picheyte tai kinaka hoijaisey etu laga bari te koisey.
Amorim, kun tailaga 8ta Premier League games majotey 5ta games harisey tai para koisey, “Apni amilaga chehra te dikhibo parey, apni etu ke ami first aha homoi aro etya ke compare kuribo parey. Hoi, pressure tu bisi asey. Ami nimitey, pride aro performance duita laga bi kotha asey. Jitya amikhan bhal perform nokorey etu tu aro bisi mushkil hoijai.”
Amorim para etu bi koisey ki United ke maidan te enaka leader laga jarurat asey kun agey ahikina team ke chinta aro bhoi laga bhabna para bahar olaidibo paribo. Dusra fale, Liverpool para taikhan laga contract karney khila important player ke para taak cholaisey. Taikhan laga Trent Alexander Arnold aro Virgil Van Djik defence te khili asey aro Mohamed Salah para EPL laga adha para bi komti homoi ja te 30 goal aro assist kuriloisey.
Add Comment