Imphal, January 22 : Manipur laga 6ta ban hoikina thaka gairkanooni group laga ekta apex body Coordinate Committee (CorCom) para January 26 te hobole thaka Republic Day tu namanabole nohoilebi ban kuribole announce kurikina rajya te 18 ghonta nimitey bandh rakhisey.
Ekta bayan te koisey ki etu total bandh tu January 25 laga rati 12 baji para suru hoikina January 26 laga shaam 6pm tak thakibo. Hoilebi emergency service jaiseki media, dhormic kaam, ilaj, pani supply aro jui bujha laga service khan tue etu bandh lagu nohobo.
Bayan te enaka koisey ki India para January 26 te Republic Day mania, hoilebi Manipur laga manu khan nimitey etu din tu ‘Repressive Day’ asey.
Corcom para koisey ki rajya te juwa 8 moina para khoon kharaba huwa karney Manipur nimitey Republic Day manibole laga eku karon nai. Ulta etu din ke rajya laga manu khan para sob ghor opor te ekta kala flag dhalikina ‘Black Day’ manabo lagey koisey.
Aji ki ki hoi asey etu khan sob nimitey Union government ke iljam lagaikina etu statement te koisey ki etya chuli thaka jhamila para Manipur ke barbad kuridisey.
Corcom tu 6ta ban hoikina thaka gairkanooni group laga ekta apex body asey kun khan para 1949 te Manipur tu Indian Union logotey join nuhuwa ageyte raja para chola Manipur para taikhan laga power aro azadi haraidiya tu wapas kuribole demand kuri asey.
Corcom group khan tu – Kangleipak Communist Party (KCP), Kanglei Yawol Kanna Lup (KYKL), People’s Revolutionary Party of Kangleipak (PREPAK), etu laga Progressive faction (PREPAK-Pro), Revolutionary People’s Front (RPF, People’s Liberation Army- PLA laga political wing) aro United National Liberation Front (UNLF) asey.
Add Comment