June 12, 2021. Manipur laga 7 districts te COVID-19 curfew jai thaka toh aro June 30 darik dak othaishe koishe. Manipur te 7 districts te COVID-19 cases aro etu bemar para manuh besi mori thaka nemite Curfew toh aro othaboli fesla loishe. Manipur Government para COVID-19 curfew otha districts toh- Imphal West, Imphal East, Thoubal, Kakching, Ukhrul, Churachandpur, aro Bishnupur. “state te Covid-19 bemar aro manuh mora toh besi hoikena jai ase, etu nemite state te halat toh bhal nahowa dak restrictions thakibo,” koikena Manipur Home Department para order te junaishe. Hoilebi, etu samai Manipur Government para additional relaxations janaishe. MSRTC complex te Airlines’ city booking reservation offices aro railway reservation office toh 10 am para 2 pm samai kulibo koishe. Hoilebi, etu 7 districts te aro Manipur laga dosura 9 districts te COVID-19 curfew nathaka jaga te inter-district movement nemite relaxation janai deya nai. Friday din Manipur te 687 notun COVID-19 cases aro 19 jun mora khobor paishe. Etu notun cases thura te itya Manipur te active cases toh 8922 hoikena ase. Manipur te 19 mora khobor hesab te itya sob melaikena COVID-19 bemar para 944 manuh morikena ase. Etu samai, State te 24 gonda pithor te bemar para 1105 jun bhal hoishe aro bemar bhal howa rate toh 83.21% te ase koishe.
Manipur: 7 districts te June 30 dak aro curfew
