Manipur : 8jun kidnapper ke arrest kurisey,  ekjun student ke bachaisey

Guwahati, December 10 : Manipur police para Imphal West laga Yumnam Huidrom te ekta operation kora te ekjun student ke bachaisey aro 8jun manu ke arrest kurisey kun khan tu ekta underground group laga cadre asey koikina suspect kuri asey.

Police official  para koisey ki etu arrest huwa manu khan para etu student ke kidnap kurisey.

Etu police para taikhan laga haath para 3ta hathyar bi paisey.

Imphal West Superintendent of Police (SP) Ksh Shivakanta Singh para koisey ki Imphal Police station para Saturday din laga phujur 1 am fale ekta complaint paisey kuntu te koisey 22 years laga Laishram Chinglen Singh ke Friday (December 8) laga din 1:30 pm fale Imphal West district e thaka  DM College of Science , New Boys’ Hostel para kidnap kurisey.

Etu student ke suraksit para charidibole nimitey kidnapper khan tailaga parivar para Rs 15 lakh mangisey aro dhomki dsey ki etu demand ke namanisey koiley taikhan laga chokra laga dead body return kuribo.

Imphal West district police laga sob team khan para complaint pa picheyte, logalog kaam te lagi jaisey aro phujur 2 am fale alag alag jag ate talashi kuribole suru hoisey.

Tai para koisey ki police para Wangoi police station laga under te thaka Yumnam Huidrom Makha Leikai te ekta operation kurisey.

Etu police para talashi kora homoitey etu haraikina thaka student ke Asem Chaoba (63 years laga) koikina ekjun manu laga ghor te paisey aro picheyte taikey tatey para churaisey. Aro utu area te duita gari te dikha 8jun suspect thaka kidnapper ke bi arrest kurisey.

Etu SP para koisey ki etu 8jun manu laga haath para 3ta hathyar paisey kuntu te ekta Ghatak rifle, ekta AK-47 assault rifle aro ekta .32 pistol logotey ekta magazine aro ekta guli paisey, 13 mobile handset, ekta Samurai (Sword) aro duita car paisey.

SP Shivakanta para koisey ki suru te enquiry kora homoitey, etu janibole parisey ki etu kidnapper khan tu Kangleipak Communist Party (KCP) aro People’s War Group (PWG) laga manu asey aro taikhan tu Lamynaba Khuman koikina ekjun manu laga under te kaam kuri thakisey.

Arrest huwa manu khan tu Khwairakpam Rajen Singh (24 years laga), Sukham James Singh (23 years laga), Moiranghem Amarjit Singh (25 years laga), Taorem Rohit Singh (23 years laga), Kakyenpaibam Hemjit Singh (21 years laga), Sandam Romen Singh (36 years laga), Khagembam Dayananda Singh (23 years laga) aro Sarungbam Umananda (34 years laga) thakisey.