Regional

Manipur : CoTU para lawaris dead body ke claim kuribo koisey

October 11, 2023
Imphal, October 11 : Manipur laga Kangpokpi district te thaka ekta shaktishali tribal underground group Committee on Tribal Unity (CoTU) para Imphal laga alag alag hospital laga  murdaghar khan  te Kuki-Zo manu khan laga lawaris dead body parikina thaka tu claim kuribole ailan kurisey.  Etu announcement tu Manipur te etya Kuki aro Meitei majotey jati laga larayi jhagra chuli thaka homoitey shanty anibole nimitey utha ekta kadam asey.
Manipur laga alag alag hospital laga murdaghor te etya pura puri 94 lawaris deadbody parikina asey. Aro larayi jhagra te etya tak 175 manu laga jaan jaisey.
CoTU laga media cell coordinator Ng Lun Kipgen para koisey, “ Etu tu India laga sarkar aro UPF/KNO  laga majotey rajneetik baat-chit kuri thaka te rajneetik solution  joldi  pabole dibole nimitey utha ekta kadam asey.”
Kipgen para authorities khan para Kuki-Zo jati laga murija manu khan laga dead body ke Kangpokpi district laga Phaijang busti te thaka Martyr’s Cemetry te somman para tupabole nimitey kadam utha karney khusi jataisey.
Tai para authorities aro civil society organization khan ke etu dead body khan ke taikhan laga ghor te suraksit para pungchaidibole request kurisey.
India laga sarkar aro UPF aro KNO laga majotey rajneetik baat-chit chola laga mamla tu CoTU para October 4 te duita National Highway (Imphal-Dimapur road aro Imphal-Jiribam road) fale almost dui moina karney economic blockade kura picheyte hey advance stage te pungchisey.
Kipgen para koisey ki CoTU para etya Imphal laga murda ghor te parikina thaka Kuki manu khan laga dead body ke claim kuribole faisla kurisey.