Imphal, November 13 : Manipur laga alag alag area khan te gondogol bar bar olaithaka laga khilaf te, mobile internet/data services aro VPN para chola internet/data services khan bon kora laga homoi tu aro 5 din nimitey November 18, 2023 laga rati 7:45 pm tak baraidisey. Etu tu rajya laga administration ke smooth para jabole dibole nimitey asey.
Etu faisla tu Manipur laga Bishnupur, Churachandpur, Imphal East, Imphal West, Kangpokpi nisna khatra thaka area khan te duita jati majotey guli mara mari huwa picheyte ahisey. Etu jankari tu Manipur Home Commissioner T Ranjing para ekta order issue kora te disey.
Eto order te, state home commissioner para koisey ki rajya laga sarkar para Manipur laga naga manu khan bisi thaka jaga Senapati, Ukhrul, Tamenlong, Noney aro Chandel an laga kunba district headquarter khan te poila para olop mobile tower khulisiley. Etu jaga khan tu gondogol para affect huwanai. Aro etu order tu Manipur laga high court para direction diya hisap te asey.
Home commissioner para koisey, judi kanoon aro beybosta laga situation thik thakisey koiley rajya laga sarkar para alag district laga headquarter khan te aro bisi mobile tower khulibole aro cholabole bhabna kuri asey.
Internet ban kora tu May 3, 2023 para suru hoisey, khali September 23 aro 24 dui din ke charikina.
Commissioner para agey barikina koisey ki internet adha adhi ban kora tu full kuridibole asey aro etu tu kunba samaj te jhagra olaidibole mon thaka manu khan para social media(whatsapp, facebook, instagram, X) khan ke photo, nafrat kora laga kotha aro nafrat kora laga video message khan transfer kuribole nimitey cholabo parey aro enaka kurikina public laga gusa ke baraidibole nimitey cholabo parey koikina ban kora laga asey.
Add Comment